N°21 | Le goût de l'Agglo - En occitan : Lo Caçolet del Cocut 2014
Cal : 800 gramas apr’aquí de mongetas tarbesas - Una cabòça de fenolh
Pel Chuc :
Tres cebas
Tres carròtas
5 gruns d’alh
150 gramas de carnsalada ( escaudada)
3 culhierats de grais de tiron
Un planpohn d’espècias al vòstre gost (sàlvia, origan, pebre tris…), e d’èrbas finas (frigola, laurièr, romanin, jalverd oriental, jalverd) per
Un bolhon ( 1 litre al mens) caud.
Per la carn e lo confiment :
300 gramas de salcissa de Lacauna
Un pè de pòrc (o de codena) escaudat
4/5 cuèissas de tiron confidas.
Cal comptar la jornada.
Botar al fuòc las mongetas e lo fenolh, amb bèlament d’aiga, un pauc de sal e de pebre tris. Menar a pichòt fuòc, cal pas que prenga lo bolh avant 5 oras. Acabar de còire amb un fuòc mai viu, fins al moment que las mongetas començan de se desfar dins la boca. Apondre de quand en quand de sal e de pebre (crentètz pas de’n metre), al vòstre gost. Al cap d’un moment, lo fenolh pòt passar dins lo chuc.
Mentretant far lo chuc. Dins una caçairòla granda o una brasièra, botatz lo grais per confir la carnsalada (escaudada) e l’ortalha abocinats pichòt-pichòt. Quand son confits (pas rabinats ni colorats), apondre pauc a cha pauc lo bolhon. Adobar de sal, pebre ( gaire, son las mongetas que se cargan de’n portar) e espècias. Menar a fuòc de brasa, dapasset, longtemps, fins al moment qu’a demesit de la mitat (2-3 oras). Escolar aquel potatge per gardar pas que lo chuc . Adobar encara ( safran…)
Botar las mongetas e lo chuc dins la caçòla amb lo pè de pòrc, e sul fòc. Brasar.
Quora chuc e mongetas an començat de confir, passar la salcissa a la padena ( la grasilha es melhora…), puèi las cuèissas de confit ( li levar los òsses) e rebodre tot aquò dins las mongetas a còire. Lo grais de la padena es de pas apondre.
Quand lo bolh pren, botar la caçòla al forn (100°-120° al mai, mens tre que se pòt) longtemps, longtemps (3-4 oras), en una passa, doas, o tres, segon l’anar de vòstra vida. Quand las mongetas de dessús se secan o venon dauradas, las rebodre e far passar dessús de mongetas blancas. Tastar sovent…
